Sa MIBF 2026

‎SA MIBF 2026

‎

‎pamilya ko na'y ang mga aklat

‎ito na yata ako magbuhat

‎nang si misis ay mawala't sukat

‎oo, wala na ang lahat-lahat

‎

‎sandigan na'y pawang mga libro

‎at katabi pa sa pagtulog ko

‎payapang diwà, ayaw sa gulo

‎maliban kung rebolusyon ito

‎

‎sa bawat libro'y huwag magtaka

‎kung paborito'y matematika,

‎kasaysayan, lipunan, pisika

‎isyu ng obrero't magsasaka

‎

‎O, aklat ng mga talinghagà

‎dama kong tunay kang mahiwagà

‎sa aking diwà pa'y maalagà

‎sa pagbasa'y tiyak may nilagà

‎

‎- gregoriovbituinjr.

‎09.10.2026

‎

‎* MIBF - Manila International Book Festival

Nasungabâ

NASUNGABÂ

‎

Galing akong tuklong nang biglang nadapâ.

Sa bilis ng lakad, ako’y nasungabâ.

‎Nag-iisip kasi nang nakatingalâ.

‎Nguso'y nagkasugat, nasa lupa'y mukhâ.

‎

Buksan ang tibuyô ang nasa isipan

Tinawid pa'y tudling doon sa tubigan.

‎Maging maingat ka'y kabilin-bilinan

‎nang di masungabâ sa dinaraanan.

‎Tingnan din ang saknong upang di matisod

‎sa usli't taludtod, magasgas ang tuhod.

Tiyaking umagwat kung mayroong bakod.

Baká sa tubigan, gamit mo'y maanod.

‎

Ingat lagi’t huwag magbakasakali.

Baká masugata'y ilong, noo't labi.

‎Kung masungaba ka’y baka pa mabungi.

Bilin ko sa iyo'y mag-ingat kang lagi.

- gregoriovbituinjr.

09.10.2026

* tuklong - Tagalog sa Kastilang kapilya

* tibuyô - Tagalog sa Kastilang alkansya

* tudling - lupang dinaanan ng araro

* tubigan - bukid (malumay ang bigkas)

* saknong - bahagi ng tubigan

* taludtod - hanay ng pananim

‎O, mga makata

‎O, MGA MAKATA

‎

‎O, mga makata, ako'y nagpupugay

‎sa inyo't sa tula ninyong kayhuhusay!

‎Katha'y tila bigas na mula sa palay,

‎na kung isasaing, kaysarap na tunay!

Kapara ng kanin, tula'y iniin-in

upang di magtutong ang niluto natin.

Minsan hihigop pa ng am sa sinaing.

Nalaglag na mumo, minsa'y pupulutin.

Ating mga tula'y parang pansit luglog

na sa mambabasa sana'y makabusog.

Sakaling masaktan o kaya'y mauntog,

paumanhin, sana bunga'y mapipintog.

‎Bilang manunula, sabi kong malimit:

‎ang salitang "pero'y" di ko ginagamit

pagkat may "datapwat", " ngunit" at "subalit".

Sa sariling wika tayo mangunyapit!

‎Sa tula ko'y walang Superman o Darna

‎kundi sambayanan, walang isang bida!

‎Kolektibong kilos, bayani ang masa!

‎Nagtagumpay pagkat sila'y sama-sama!

Kaya, O, makata, padayon! Padayon!

Angkin nating diwa ay di makakahon!

Diwa'y naglalakbay at naglilimayon

sa mundo kung saan tayo paroroon!

‎

‎- gregoriovbituinjr.

‎09.09.2026

‎

‎* litrato mula sa larong Word Master

Batas sa ating bansa

BATAS SA ATING BANSA

ginagawa / ng agila'y / batas para / sa tilapya

lawin nama'y / nagsabatas / ng pambiya't / labahita

batas niyong / uwak, para / sa kanduli't / hasa-hasa 

nililikha / ng kuwago'y / batas para / sa pugita

bakit gayon / ang nangyari / ay di naman / magkauri

kapara rin / ng Kongresong / dinastiya / yaong hari

pawang batas / ay patungkol / sa pribadong / pag-aari

silang tingin / sa obrero't / maralita / ay kadiri

ang serbisyo / ay nagosyo / nitong ibong / malalakas

kaya anong / aasahan / nitong isda / kundi dahas

mga isda / yaong dapat / na gumawa / nitong batas

nang tiyaking / batas para / sa isda'y di / butas-butas

pag di tayo / namumulat, / dinastiyang / pulitikal

ang sa masa't / dukha'y lagi / nang sisiil / at sasakal

- gregoriovbituinjr.

09.08.2026

Depinisyon nila ng progreso

DEPINISYON NILA NG PROGRESO

sinira ang kalikasan

minina ang kabundukan

kinalbo ang kagubatan

para raw sa kaunlaran

trato sa puno ay troso

kaya gubat na'y kinalbo

una'y negosyo, di tao

iyan umano'y progreso

nilagyan ng paliparan

iyan daw ang kaunlaran

ang nangyari'y palubugan

lubog sa baha ang bayan

ano nga ba ang progreso

kung di kasama ang tao

kung serbisyo na'y negosyo

kung sinira na ang mundo

- gregoriovbituinjr.

09.05.2026

Munting dalit sa PLM

MUNTING DALIT SA PLM

‎O, kabataan at masa

‎magkaisa, makibaka

‎mag-organisa, magpasya

‎‎maging mga sosyalista

‎tara nang magsama-sama

‎Partido Lakas ng Masa

‎tayo ang alternatiba

‎baguhin na ang sistema

- gregoriovbituinjr.

09.05.2026

‎

‎* binigkas kong munting dalit sa forum ng PLM, 09.05.2026

* ang dalit ay uri ng katutubong tulang may walong pantig bawat taludtod

‎‎* nagpasya na rin akong magbahagi ng kaunting kaalaman sa sining ng pagtula sa mga maralita, manggagawa, at kanilang mga anak dito sa kalunsuran

Nag-iisang tulâ

pinasa sa Liwayway magazine

‎ang iisang tulang nakatha rin

‎‎sana tula'y ilathala nila

kung pasok ‎sa kanilang panlasa

‎bagamat ako'y isa lang dukhâ

sana'y di ibasura ang tulâ

‎

‎sampung pantig bawat taludtod, 

‎may sesurang 5/5

‎

‎NAG-IISANG TULA

‎

‎ako'y tiyak na mapapaluha,

‎o lulundag nang dahil sa tuwa

‎pag sa Liwayway nabasang sadya

‎at nalathala ang tulang katha

‎

‎nagpasa noong talubata pa

‎noong kaysipag ko pa talaga

‎sulat ng sulat, pasa ng pasa

‎binalewala, walang halaga

‎

‎ngayon, pinasang tula'y isa lang

‎ng abang dukhang di na malaman

‎kung saan yaring patutunguhan:

‎kinabukasan o kamatayan?

‎

‎nang mawalâ ang sintang maybahay

‎pagkat sa sakit ay naparatay

‎nawalan na ring gana sa buhay

‎takipsilim na't walang liwayway

‎

‎ikatutuwa tiyak ni misis

‎pag sa Liwayway ay nagkahugis

‎ang tulang sana ngayo'y di mintis

‎kinatha hanggang dugo'y tumigis

‎

‎ngunit wala na, wala na siya

‎nang sa Liwayway, kanyang mabasa

‎ang iisa kong tulang pinasa't

‎inakda mula sa alaala

‎

‎- gregoriovbituinjr.

‎09.04.2026