SALAMISIM
nagtago ang buwan sa kabila ng mga ulap
tila ba ako'y di masambit ang mga pangarap
mayroong simuno't panaguri sa pangungusap
upang mabanggit ang nakalutang sa alapaap
nangingilid pa rin sa luha ang tangan kong pluma
bakit di pa rin lumalaya sa hirap ang masa?
mahirap pa rin ang masisipag na magsasaka
o ang talagang problema'y ang bulok na sistema?
dinig ko pa rin ang hunihan ng mga kuliglig
habang sa lamig ang katawan ko'y nangangaligkig
alagaan natin ang kalikasan at daigdig
at sa uring manggagawa'y makipagkapitbisig
patuloy akong susulat para sa uri't bayan
magpapahinga lang sa pagdatal ni Kamatayan
- gregoriovbituinjr.
10.17.2022
Walang komento:
Mag-post ng isang Komento