Di mapipigilan ng tulâ ang punglô

‎DI MAPIPIGILAN NG TULÂ ANG PUNGLÔ

“A poem cannot stop a bullet. A novel can't defuse a bomb. But we are not helpless. We can sing the truth and name the liars.” ~ Salman Rushdie

‎

‎di mapipigilan / ng tulâ ang punglô

‎na tama rin naman / pag iyong natantô

‎gusot sa pagitan / ng magulong mundô

‎ay dapat ayusin, / maplantsa nang buô

‎

‎di makakakalas / ng mitsa ng bomba

‎ang mahabang kathâ / nitong nobelista

‎subalit di tayo / kulangpalad, dusta

‎pagkat tayo pa ri'y / may magagawâ pa

‎

‎ang katotohana'y / maaawit natin

‎mapapangalanan / yaong sinungaling

‎di tayo kawawà, / marapat ay gawin

‎sa ikabubuti / ng lahat sa atin

‎

‎tutulan ang digma / ng imperyalismo

‎na dahilan kayâ / tumaas ang krudo

‎ang buhay ng kapwa'y / dapat irespeto

‎ngunit ikulong 'yung / korap sa gobyerno

‎

‎mula sa panulat / ni Rushdie na sikat

‎ay itinulâ ko / ang isiniwalat

‎tumula't tumudlâ / nang makapagmulat

‎akong inyong lingkod / gamit ang panulat 

‎

‎- gregoriovbituinjr.

‎03.14.2026